A tolos hermanos y hermanes francmasones. A tola ciudadanía:
Vivimos un momentu históricu, de los que permanecen na memoria vital de tolos que pasen per él y de los que queden nos llibros p’alcordanza de les xeneraciones futures. Nuna atmósfera irreal dafechu vemos les cais de los nuestros pueblos y ciudaes vacies, y cuando topamos a los nuestros vecinos y amigos, lleven una mázcara y nun podemos averanos a ellos. Vamos como autómates a facer la compra, guardando distancies que d’otra forma nun guardaríemos, ensin falar casi con naide, cola reciella trancada en casa, teniendo que xustificar énte la policía los nuestros desplazamientos, viendo incluso cómo militares uniformaos tomen les víes principales de circulación. Como nuna horrible distopía, o tamién l’alcordanza d’un tiempu muncho más escuru de la nuestra Historia, paez que tamos viviendo una velea colectiva dende hai siete selmanes.
Ye en momentos de crisis como esti cuando rescamplen los valores y los vezos colectivos que conformen la cultura social d’un pueblu. Una sociedá educada, y hasta adoctrinada, nel consumismu y l’individualismu más feroz lleva mal el confinamientu en casa. Sicasí, los casos d’incumplimientu de les normes impuestes pola alministración pa torgar l’andancia son claramente minoritarios, por más qu’hebia intereses en facenos pensar lo contrario.
Los francmasones tenemos como principios y oxetivos fundamentales los de la llibertá, la igualdá y la fraternidá, fíos de la razón ilustrada, que compartimos col republicanismu neoclásicu. Les midíes estraordinaries provocaes pol estáu d’emerxencia afecten enforma la plasmación d’estos valores na nuestra vida cotidiana:
El confinamientu afecta a la nuestra llibertá de movimientu. Nun podemos salir de casa namás que p’acciones mui concretes. Bona parte de los sitios a los que quixéremos dir tán, amás, trancaos. La nuestra llibertá d’asociación tamién ta suspendida, dao que nun tán permitíes les reuniones, ente elles les nuestres tenides masóniques. Tamién lo ta la llibertá relixosa, al nun se poder facer mises, rezos colectivos, comuniones, bodes, bautizos, procesiones o intierros. Y la llibertá de manifestación, al nun poder exercese nes cais y places sinón namás en ventanes y balcones. Hasta la llibertá afectivo-sexual ta en cierta forma suspendida, a nun ser que les pareyes vivan baxo’l mesmu techu, al tar prohibíes les visites. Entendemos estes midíes como transitories, feches col envís de torgar un mal mayor, y nun podemos aceptar les crítiques en nome de la llibertá y d’un supuestu sacrosantu derechu individual a saltase les normes puestes pol estáu. La llibertá d’esparder un virus potencialmente mortal nun ye un derechu, ye una irresponsabilidá criminal.
El confinamientu afecta tamién a la igualdá. Ye evidente que vivimos nuna sociedá atravesada por fondes desigualdaes, y estes rescamplen enforma más en tiempu de crisis. Nun ye lo mesmo pasar el confinamientu nuna casa grande y con toles comodidaes que nun chamizu ruinosu. Nun ye lo mesmo conservar l’empléu teletrabayando que perdelu dafechu o tar nun ERT esperando a ver si escampla. Nun ye lo mesmo teletrabayar con tolos medios que facelo en condiciones precaries o mínimes. Nun ye lo mesmo teletrabayar que tener que dir presencialmente al puestu de trabayu aumentando asina’l riesgu de contaxu. Nun ye lo mesmo tar confináu nuna residencia d’ancianos curiosa que n’otra onde nun se cumplen les normes mínimes. Nun ye lo mesmo tar confináu nun teniendo problemes emocionales o adicciones que teniéndolos. Nun ye lo mesmo tar confináu nun ambiente familiar sanu que n’otru insanu o, pior, violentu.
Y el confinamientu afecta tamién a la fraternidá, que ye nos momentos revesosos cuando más necesaria ye. El confinamientu de les persones mayores soles en casa pue llevase meyor si tienen xente que cuide d’elles. El confinamientu ensin medios de subsistencia solo ye posible si hai ayudes económiques de les alministraciones o de cuidaos, alimentos y otros servicios de les ONGs. El confinamientu de les persones vulnerables pola so situación mental o anímica pue ser un infiernu si nun echen un gabitu la familia o los amigos. Ayudar al vecín que lo necesita, o llamar a amigos, collacios y familiares necesitaos d’apoyu ye siempre necesario pero nesti contestu más. La fraternidá, el tratamientu ente toos y toes como fratres y sorores, hermanos y hermanes, en pie d’igualdá y ensin submisión a un patronus, y la solidariedá, l’actuar toos xuntos formando un daqué sólidu frente a una agresión o problema esternu, nun puen nunca sustituyise pola caridá por mui arrogante que seya esta, xeneralmente esteriorizada de forma farisea y qu’amás úsase munches veces como forma de llavar una imaxe emporcada por, ente otres coses, una evidente elusión d’impuestos.
Pero si ye necesario sulliñar la importancia de los valores de llibertá, igualdá y fraternidá na presente crisis y l’exerciciu de los mesmos, va selo más importante tovía en pasando l’andancia, cuando toque encarar la llaceriosa situación económica qu’esta dexa. Una economía paralizada per dos meses dexa evidentes secueles, y nuna sociedá en crisis permanente como l’asturiana dende hai trenta años tovía más. La importancia de lo público, de lo colectivo, frente al interés priváu y particular ye fundamental. Podemos salir d’esta crisis más llibres, más iguales y más fraternos o, por contra, más siervos, desiguales y egoístes.
La sida del control epidemiolóxicu pue llevanos a reforciar les ferramientes de control de mases al traviés de les nueves tecnoloxíes, convirtiendo a la ciudadanía en marionetes controlaes dafechu nos sos desplazamientos, vezos de consumu o historial sanitariu. Como rates de llaboratoriu de les grandes corporaciones o d’un estáu meticón, podemos venos d’equí nunos años asumiendo adulces retayos inaceptables nes llibertaes civiles pa supuestamente garantizar la seguranza colectiva, como yá se fixo xustificándose na llucha antiterrorista. Los bilordios, llevantos y mentires puen vese elevaos a la categoría de noticies per parte de medios de comunicación ca vez en menos manes, o utilizaos como pantalles de fumu por escuros intereses pa que seya imposible estremar la rialidá de la ficción. Les concepciones conspiratives de la Historia suelen valir pa criar monstruos que siempre amenacen la llibertá. Los masones sabemos abondo d’ello porque tocónos sufrilo.
La sida de la salida de la crisis pue llevanos a nuevos ataques a los derechos llaborales con más precarización del empléu, y polo tanto de les condiciones de vida. Munchos de los negocios que tuvieron que baxar la persiana estes selmanes posiblemente yá nun podian volver a llevantala. El gastu públicu qu’impliquen los ERTes, los subsidios de desempléu o la necesaria renta mínima de subsistencia nun pue salir namás de los impuestos que paguen los trabayadores mientres se sigue tolerando la elusión y la evasión fiscales. El control públicu de los servicios esenciales ye una ferramienta básica pa garantizar l’accesu n’igualdá a unos estándares vitales mínimos.
La sida del aforru y el control del gastu públicu pue llevanos a aplazar debates inaplazables como’l de la renta básica, la dotación de medios p’aplicar la Llei de Dependencia o en xeneral la política de los cuidaos. Y el desixir a les alministraciones que garanticen esos mínimos al conxuntu de la población tampoco pue valir pa escapar de la responsabilidá individual pa colos compañeros de trabayu, vecinos, amigos o familiares. L’acción individual ye condición necesaria pa l’acción colectiva y les conquistes comunes. Namás siendo fraternos podemos ser efectivamente iguales. Y namás siendo efectivamente iguales podemos ser rialmente llibres.
Vienen tiempos revesosos, y los masones nun podemos quedar al marxe. Munchos van ser los debates sociales de los prósimos años, como qué sistema productivu queremos pa nun venos na situación na que tamos, qué utilidá rial tien una UE que nun ye a actuar de forma conxunta y solidaria nuna situación de pandemia, qué comerciu internacional ye necesariu pa nun depender dafechu del suministru esterior, o cómo acabar coles estructures d’una corrupción que, anque yera un secretu a voces, agora rescampla que llega a la propia figura del rei eméritu.
Llega’l 1u de mayu, Día del Trabayu, que se celebra en tol mundu dende 1890, y esti añu les cais d’Asturies, como les de casi tol mundu, tarán vacies de trabayadores reclamando los sos derechos. Ye igual, porque tiempu abondu habrá pa reclamalos n’acabando’l confinamientu. La nuestra loxa, El Trabayu, garra’l so nome n’homenaxe a la loxa El Trabajo fundada en Trubia en 1872. La nuestra elección nun ye casual. La glorificación del trabayu ye un deber masónicu qu’asumimos con gana pa encarar la xera que tenemos per delantre. Porque xera hai abonda.
Güei más que nunca, Llibertá, Igualdá, Fraternidá
Respetable Loxa El Trabayu 2.087
Federación Española de la Orde Masónica Mista Internacional Le Droit Humain
Xixón, Asturies, 30 d’abril de 2020
