A tolos hermanos y hermanes francmasones. A tola ciudadanía:

        Un añu más, na víspora del 1 de mayu, dende la Loxa El Trabayu queremos dirixinos al conxuntu de la sociedá pa tresmitir los nuestros pruyimientos pola situación na que tamos viviendo. Si hai un añu, en mitá del confinamientu, falábemos de les amenaces que la situación d’andancia podía xenerar pa la llibertá, igualdá y fraternidá colectives, tenemos que dicir qu’eses amenaces, y otres nueves, puen acolumbrase apocayá y con fuercia curiosa. La esperanza qu’abre’l procesu de vacunación masiva en cursu nun pue tapar un previsible escenariu post-andancia caracterizáu tanto pol deterioru económicu como por, na mesma midida, social, que mos lleve a la desesperanza colectiva.

        La situación que va dase d’equí nunos meses cuando munchos de los negocios afectaos polos zarros intermitentes por mor de la situación sanitaria acaben pesllando dafechu, y cuando bona parte de los ERTEs pasen a ser despidos, va obliganos, a les instituciones pero tamién al conxuntu de la sociedá, a un exerciciu de solidariedá colectiva si nun queremos que les mancadures sociales que provocó la COVID-19 dexeneren en daqué pior tovía.

        Asistimos a debates falsos, que desvirtúen dafechu’l sentíu de los valores que defendemos.

        La LLIBERTÁ nun ye decidir nun se vacunar mientres lo faen los demás a ver qué pasa, porque ye una irresponsabilidá y un actu d’egoísmu inaceptable. Tampoco lo ye pretender caltener los vezos d’ociu arreblagando per normes d’horarios y zarros perimetrales, porque esos comportamientos provoquen contaxos, y los contaxos muertes.

        LA IGUALDÁ nun ye pretender normes restrictives pa los demás anque la situación sanitaria nun lo faga necesario porque les tenemos nós en casa, porque eso nun ye igualdá, ye envidia.

        LA FRATERNIDÁ nun ye adoptar una estratexa conxunta d’atropar vacunes pa los estaos de la UE, desentendiéndose del restu del planeta. Nun se val ser fraternu pa los miembros del club y dexar a los demás fuera, pero ye que pancima ye miope: si la vacunación nun ye mundial, en dellos años les mutaciones del virus fadrán inútiles les actuales vacunaciones nel mundu desarrolláu.

        Asistimos nesti añu a coses que paecíen imposibles hasta va poco y que cuando se fixeron imprescindibles pasaron a ser una rialidá, como’l teletrabayu. Vióse cómo les empreses arronchaben hasta que nun-yos quedó otra, y vemos cómo pretenden aprovechar agora esa ventana pa intensificar la esplotación llaboral teledirixida.

        Vemos con gran esmolecimientu cómo s’esparden llevantos y falses noticies, y cómo se multiplica’l so efectu non tanto porque la xente les crea sinón porque valen pa confirmar prexuicios. Tracamundiar memes con noticies, opiniones con datos, o verdaes contrastaes con ocurrencies nun ye una amuesa de la llibertá d’espresión, sinón d’una enfermedá social mui fonda y más revesosa de tornar tovía que la del presente coronavirus. La ignorancia, y muncho más la ignorancia voluntaria, ye mortal a llargu plazu.

        Resultáu de la desinformación y los llevantos sumaos a la incertidume social y económica vemos cómo s’estigmatiza a colectivos concretos, pretendiendo convertilos en chivos espiatorios de les carencies sociales que tien una sociedá que nun se recuperó de los retayos nos servicios públicos na década pasada. Vémoslo col casu de los menores estranxeros non acompañaos, los MENAs, colectivu minúsculu no cuantitativo pero qu’algama una importancia cualitativa pergrande cuando hai una voluntá política espresa de señalalu.

        Sicasí, l’espardimientu de llevantos y de noticies falses per amplies capes sociales nun ye resultáu namás de la mala voluntá política d’unos pocos y de la irresponsabilidá de munchos que quieren creeles, sinón tamién de los medios de comunicación profesionalizaos, qu’en cuenta de cumplir col so deber d’informar tán convirtiéndose en cómplices al esparder noticies falses ensin contrastales mínimamente, col dañu terrible que faen a mediu plazu a la so credibilidá, yá escasa cuantayá.

        Llegamos asina a un primeru de mayu nel que, como diz el cantar, negres tormentes ximielguen l’aire, y nubes escures tórguennos ver. Cuando los ERTEs pasen a EREs, y los EREs a despidos. Cuando venga una nueva contrarreforma llaboral y se pretendan retayar derechos sociales, va ser más necesaria que nunca la defensa de los principios de llibertá, igualdá y fraternidá. La llibertá nun ye poder tomar una cerveza nun bar a les 11:00 de la nueche si nun se tienen ingresos pa pagar esa cerveza, o una casa a la que volver cuando tranque’l bar. La igualdá nun ye quitar impuestos tanto al que paga muncho porque muncho tien como al que nun paga nada porque nada tien. La fraternidá nun ye fomentar organizaciones sindicales qu’axunten a patronos y asalariaos. Llibertá ye tener la independencia económica que mos permita tener un plan de vida. Igualdá ye tener unos servicios públicos  que garanticen la mesma atención al conxuntu de la población. Fraternidá ye ser consciente de que l’aición colectiva de los iguales ye la ferramienta p’algamalo.

        L’otru añu la sociedá entera taba encerrada en casa. Esti, adulces, vamos dir recuperando la sociabilidá que se mos negó por motivos sanitarios. Falta fai. Pa vese, pa cuidase, pa falar y debatir, pa organizase. Que nun mos apodere la desesperanza.

        Güei, más que nunca: LLIBERTÁ, IGUALDÁ, FRATERNIDÁ